بعد ما الاعتماد على الذكاء الاصطناعي انتشر أكتر وأكتر في شغل الماركتنج خصوصًا في الجانب البصري سواء تصميمات أو فيديوهات.. بقى منطقي طبعًا اللجوء ليه والاعتماد عليه طالما قادر يسد..

بس دايمًا عندي سؤال.. هل الاعتماد عليه ده بيوسع الإمكانيات ويوفر الوقت ويزود الإنتاجية والدنيا تمام على كده؟ ولا هو كمان من غير ما ناخد بالنا بيحجمنا وبيخلينا نتحرك كلنا في نفس الإطار؟

حتى لو الإطار ده واسع شويتين تلاتة.. بس في الآخر هو إطار واحد هيخلي كله شبه بعضه.. ولا إيه؟

أنا بحكم شغلي عديت على ديزاينرز كتير بمختلف الخبرات والإمكانيات والعقليات.. واللي حاسس بيه دلوقتي إن كل ما الاعتماد على الذكاء الاصطناعي بيزيد كل ما بحس بافتقاد للديزاينات اللي على قديمه.. ما قبل عصر البرومت..

يمكن حجم الاعتماد على التقنيات الجديدة هو اللي يفرق ديزاينر عن التاني.. شوفت اللي لسه بيعمل مجهود وبيقلل تدخل الـ ai بقدر الإمكان.. وشوفت اللي الـ ai بيعمله الديزاين بالكامل لدرجة إن ما يبقاش معاه psd للديزاين حد يكمل عليه بعده.

أظن محتاجين توازن ما .. نسبة واضحة حتى ولو يكن متفق عليها ضمنيًا.. اللي هو مثلًا إحنا هنعتمد على الـ AI بنسبة 30% بس وباقي النسبة الادوات التقليدية اللي بتطلع شغل قوي ومبهر طول عمرها عادي من قبل الـ AI .. الفكرة في تمكن وشطارة وفهم الديزاينر.

أو مثلًا نقول هنعتمد على الـ ai باعتباره بديل للـ stock images .. هناخد منه بس صور أشخاص بالشكل والوضعيات اللي الديزاين محتاجها.. لكن هنكمل احنا الديزاين عادي بالكامل زي زمان.

أو هنستبدله بس في شغل الـ photo manipulation لكن باقي نوعيات التصميم هنعملها لوحدنا عادي زي زمان.

مش عارف إيه الصح بس الأكيد إني مش مرتاح للاعتماد الكامل على الـ ai.